【明報專訊】「佔中九子」案開審，一眾被告日日上庭，西九龍裁判法院附近冇啖好食，點算？中大社會學系副教授陳健民(KM)太太每日都會為九子煮晒午餐，前日食芋頭鹹肉炒飯，噚日就食魚鬆炒燈籠椒紅米飯，KM話佔領時期太太都會為示威者準備食物，所以今次官司都想咁做，仲話見啲後生仔冇住家飯食，朱耀明牧師身體又唔好，所以都特登煮得健康啲。雖然陳太近日唔舒服，但仍然堅持要煮飯，KM都怕佢辛苦呀。

戴耀廷太太幫黃浩銘做早餐

社民連副主席黃浩銘噚日都喺fb出post，話港大法律學院副教授戴耀廷(Benny)太太幫佢整三文治做早餐，仲話20日聆訊會有20份唔同早餐𠻹。阿銘同Emily講，因為住得近，Benny每朝都會車埋佢同KM去法院，所以都整埋早餐畀佢食。每日晏晝除咗有KM太太嘅愛心午飯，Benny老婆都會帶水果畀大家食，阿銘話每日大家都齊人食飯，令審訊期間都有好多正能量撐落去，大家都好溫暖咁話。