【明報專訊】已退出民協嘅馮檢基前日突然通知傳媒，話噚日會正式報名出戰立法會九龍西補選，相信唔少人都始料不及阿基咁快報名，不過對民主黨李永達?講就係「意料之內」，事關佢前晚喺自己網台節目透露，日前喺一場婚宴上被黨友涂謹申問到，覺得基哥係咪會喺工黨劉小麗被取消資格(DQ)後先參選，阿達認為唔係，相信馮檢基「點都會選」，阿涂唔認同，同佢賭一餐飯，結果不出一日已分勝負。

阿達喺節目中話相信劉小麗即使成功入閘，阿基都會搬出大量理由唔退選，自己已將阿基當成建制派，唔再相信佢，聲言同對方「正式一刀兩斷」。立法會前議員黃毓民前晚亦喺自己網台節目透露，阿基搵過佢傾補選部署，但佢認為阿基唔應該去馬，因從任何角度睇都無好處，一嚟阿基贏出補選機會係零，二嚟出選一定會被指「𠝹票」。另外，曾於2016年報名參選立法會、後因港獨政綱被選舉主任DQ嘅中出羊子(原名鍾銘麟)，近日喺facebook表示正積極考慮參加今次補選，話本月15號前(即提名期結束前)「會有重要消息宣布」。