【明報專訊】超強颱風「山竹」廣泛破壞香港市面，樹枝甚至樹幹被吹翻，阻礙主要道路之餘亦對居民構成危險，不論建制定泛民區議員，唔少人噚日見風勢減弱，都出動幫手清理路上塌樹，沙田區議員麥潤培帶同修剪器落區剪樹，同屬泛民嘅丘文俊亦「手起鋸落」，用手鋸鋸樹，並清理街上雜物。另一邊廂，民建聯北區區議員劉國勳都喺區內同熱心市民齊齊清樹，但著錯短褲嘅佢就畀紅火蟻咬到痛。

劉國勳話，經過一個上晝，自發清理樹木嘅市民由最初幾個人增至十幾人，初步清理?粉嶺部分行人路口、馬路同巴士站，畀行人同車可以用番條路，至於倒塌嘅大型樹木就要交由警隊同消防處理。工聯會亦喺facebook出post，講吓佢哋各區議員同地區幹事噚日亦落區幫手清理。

眾志樹枝放斜坡被質疑

香港眾志幾個成員噚日同樣帶埋工具，喺南區清理塌樹，並喺fb直播，不過佢哋將馬路上嘅樹枝執起後，唔係搬去其他地方處置，而係將樹枝棄置喺現場行人路欄杆外嘅斜坡，被部分網民質疑好心做壞事，「掉落山岥(坡)你叫真正負責清理嘅部門點清理？」眾志就強調，佢哋只係將樹枝放喺斜坡頂端，並無滾落危險。