【明報專訊】政府上星期開始已召開跨部門會議應對超強颱風「山竹」，不過有市民就因為噚日要返工但面對無車引致嘅交通混亂而對政府非常不滿，噚日特首林鄭月娥聯同保安局長李家超等人見傳媒，李家超一開口就搞錯今次風暴個名，將「山竹」講成「天竺」，唔少網民嘲笑局長，質疑「去(天竺)取西經呀？」；又形容警隊出身嘅李家超都係去捉賊比較好。 林鄭fb「舒一口氣」吸負評 至於林太未有宣布噚日「停工」，只呼籲僱主畀員工彈性上班，用互諒互讓、體恤嘅方法去做，亦引嚟批評，並「成功團結」泛民建制齊齊鬧爆政府。 特首前晚喺facebook形容颱風遠去「舒一口氣」嘅帖文中，一日之間就有逾7800個留言，以負評居多，有人形容「舒一口氣」難聽過粗口；有人認為林太離地，質疑佢有專車接送，唔明白市民根本無辦法返工云云；民建聯北區區議員姚銘就至少兩度留言，要求政府宣布停工，以及指出東鐵沿線交通大癱瘓。
|
| |
| |
