【明報專訊】亞運游泳港隊選拔引起爭議,早前有報道指有運動員喺100米蛙泳時間最快,但奧委會揀咗較慢嘅代表港隊出戰,未有解釋原因。民主黨噚日喺facebook推出短片,二次創作舊電視劇《戀愛自由式》,將內容以剪接同配音重新演繹,提到最快嘅泳隊竟然落選,藉此質疑奧委會今次「黑箱作業」,要求交代甄選準則。
民主黨「惡搞台」嘅二創短片內,兩隊泳隊鬥得難分難解,但鏡頭一轉,就見到港協暨奧委會會長霍震霆,話泳隊喺比賽拎到第一名,但游得快唔一定代表港隊出戰,隨即被問係咪游得慢就可以出戰?「霍震霆」就話「講得無錯」,因為經過慎重考慮,游得第二快嘅泳隊各方面都優勝少少,即使該隊被取消資格,都係由第三快嘅頂上咁話。
民主黨話,足球同籃球隊員選拔落選都可以話係戰術需要,但游水游得最快都會落選,質疑係咪因為運動員唔係出身香港業餘游泳總會(泳總)旗下泳會,就會直接落選。民主黨話除咗懷舊一下電視劇,亦希望還運動員一個公道。而奧委會義務秘書長王敏超日前就承認是次選拔「多爭拗」,但重申奧委會按客觀標準選拔。