【明報專訊】無論係中央官員定特區政府，近年都話要加深香港人對《基本法》嘅認識，經民聯林健鋒喺有關財政預算案嘅提問，問呢幾年政府印製同向公眾派發嘅《基本法》印刷本數量。原來2017/18年度，政府印咗7.5萬本基本法派發，多過2015/16年同2016/17兩個財政年度，分別印刷5.8萬和4.5萬份。 中聯辦主任王志民日前話，香港需要加強憲法教育，商界(二)議員廖長江就問政制局，喺2017/18及2018/19兩個財政年度，政府有無預留預算開支推廣《憲法》。當局回應話，一直以來宣傳推廣基本法內容，都係「一國」及「兩制」並重，當中亦包含憲法和基本法關係。當局會繼續透過不同途徑舉辦活動，加深市民認識。2017/18及18/19年度，相關開支及預算每年約1700萬元。 民建聯黃定光問當局會唔會推行「反港獨」宣傳，政制局回應話，已留預算令市民對一國兩制及基本法有更深認識，無特別為「反港獨」議題專門撥出開支預算。
|
| |
| |
