【明報專訊】準時交稅唔係人人做到，稅務局噚日向立法會財委會提交資料，回應議員就稅局工作嘅查詢，其中經民聯林健鋒就關注追討欠稅。稅局透露，截至今年2月底，逾期未繳稅單共有15.8萬張，而截至當日嘅2017/18年度，稅局就4類稅種(利得稅、薪俸稅、物業稅、個人入息課稅)逾期未交稅款所徵收嘅附加費，有成4.14億元，涉及稅款67.63億元。 估計成功追稅26.8萬宗 追稅唔少得人力物力，稅局表示，局下嘅追討欠稅組有220個編制職位，由一個助理局長主管，追討欠稅組喺2017/18財政年度嘅修訂預算撥款係1.279億元。稅局話，納稅人如果欠稅，局方會積極追討，跟進行動包括徵收附加費、發出警告信，同埋經法院提出民事訴訟等，喺2017/18年度，完成追稅嘅個案估計達26.8萬宗。 稅局話，個別因為財政困難而未能準時交稅嘅人士，可以申請分期繳稅，強調其他個案嘅追稅工作𠵱家仲做緊，涉及法律程序嘅個案比較需時，稅局未必能夠短時間內搞掂，仍然會繼續採取適當行動，保障政府稅收。
|
| |
| |
