【明報專訊】騙徒手法真係層出不窮，政府噚日出稿，通訊事務管理局辦公室話接獲市民舉報，表示近日收到聲稱由通訊辦撥出嘅欺詐電話，電話以廣東話及普通話播出預錄信息，指接電者違反《電訊條例》，其電話服務將被暫停。

近年電話騙案不斷，騙徒有時冒認係內地執法部門，話你違反內地法律，叫你匯錢去銀行解決糾紛，又有騙徒冒充香港各部門人員，目的只有一個：呃錢！通訊辦就話，最新收到嘅舉報騙案，顯示該欺詐信息所涉來電號碼嘅前方帶有「+」號。

發言人話，通訊辦從未撥出呢類電話，亦唔會向市民撥出任何載有預錄信息嘅電話，市民要留意；又話流動電話顯示嘅來電號碼前方如帶有「+」號，即表示有關電話源自香港境外。大家喺任何情况下都唔應該喺電話對話中披露個人資料，如果對電訊服務使用情况有疑問，可直接聯絡電訊營辦商查詢。