【明報專訊】工務小組噚日審議高鐵撥款，主席盧偉國(圖)提出「劃線」限制議員發言，引嚟泛民極度不滿，會議場面混亂，社民連梁國雄仲要求盧偉國出示身分證，又話主持會議嘅盧偉國唔係人，搞到盧偉國要趕佢走。 話說盧偉國宣布劃線之後，在場泛民非常激動，不斷打斷主席發言，搞到要休會5分鐘，但混亂喺復會之後惡化，雖然盧偉國嘗試唔理咁多，但泛民繼續大聲表達不滿，其中長毛就要求盧偉國出示身分證核實佢嘅身分，因為「我懷疑你唔係盧偉國，以前嘅盧偉國唔係咁衰嘅；盧偉國係人嚟嘅，今日嗰個盧偉國唔似人」，結果主席就話長毛說話冒犯，要將佢趕離會議廳。 長毛梗係冇乖乖咁走，話盧偉國大可以報警，而人民力量陳志全、工黨何秀蘭、公民黨毛孟靜等就圍住梁國雄唔畀保安帶走佢，令會議再度中斷。擾攘一輪，最終大家讓步，長毛願意唔質疑盧偉國嘅身分，主席亦願意收回趕人走嘅決定。 後嚟民主黨黃碧雲提出休會辯論，譚耀宗就批評泛民發言「重複又重複」，但陳偉業插嘴話高鐵安全問題會死人，搞到譚sir拍枱大罵，話𠵱家唔係大嚿發言嘅時候，「乜嘢都會死人㗎，食飯都會死啊，你唔好食飯！」
|
| |
| |
;){kind=small}
