【明報專訊】「一帶一路」國策係中央最新風向，香港政界上下都熱捧，新民黨葉劉淑儀搞海上絲綢之路協會，特首梁振英亦成立督導委員會大力推動。噚日又有一間掛名一帶一路嘅機構成立，今次由經民聯梁美芬夫婦籌組，全名叫「一帶一路研究院」，兩夫婦分別做院長同副院長；另一個副院長就係全港各區工商聯會長李鋈麟。 除咗研究，研究院又會搞徵文大賽，鼓勵青少年對「一帶一路」提出自己嘅獨特睇法，仲分埋中學組同公開組，成個比賽獎品總值有成10萬蚊！一帶一路對市民嚟講都幾離地，李鋈麟就話，「就係要佢哋學」，擔心5年後如果年輕人仲唔識一帶一路，見工都會畀老闆淘汰。 梁美芬話，邀請咗25個國際專家一齊研究一帶一路沿線國家法律問題，已籌集7位數字、過百萬嘅民間資金，噚日喺成立典禮，特首梁振英、財庫局長陳家強都有親自撐場，認真大陣仗。美芬又話，已同中聯辦「打過招呼」，對方亦樂見研究院成立。 梁美芬又話，研究院同葉太搞嘅海上絲綢之路協會好唔同，「我哋主要做研究報告，專業啲，佢哋做有關社團，面向社會多啲」，仲話唔排除日後有機會可以合作𠻹！
|
| |
| |
