【明報專訊】立法會內委會今日開會，包括選舉新一年嘅正、副主席，泛民早前建議民主黨單仲偕做內會副主席，建制派未接受但亦無否決，原本一直處於懸而未決階段，但隨着泛民公開話會派人參選所有委員會正、副主席後，被建制派視為「全民開戰」；建制派內部亦決定，由無黨派嘅馬逢國「應戰」出選內會副主席，如果今日開會建制派夠人齊，相信單仲偕極大可能會輸。 綜合建制派消息，原本建制派唔係話一定接受唔到單仲偕，但既然泛民講到要開火，咁建制就無得留手喇。不過，自由黨表明會支持泛民出任，所以今日都會投票畀單仲偕，而建制派中，據聞經民聯劉皇發、無黨派廖長江今日都唔會開會，開會投票無得「等埋」邊個，牌面雖然馬逢國佔優，但都唔係話無暗湧。 至於財委會方面，建制派屬意保險界陳健波做主席、民建聯陳鑑林做副主席，相信陳健波當選無懸念，但自由黨同樣表明會撐泛民做「財副」，選情同「內副」一樣，建制出席人數係關鍵。
|
| |
| |
