【明報專訊】籌備咗成4年、有「藍剔認證」嘅「香港警察 Hong Kong Police」facebook專頁推出咗唔夠1日，就多咗個相似名稱專頁「正宗香港警察Hong Kong Police」！Emily問過警察公共關係科，佢話個專頁唔係警務處開立嘅帳戶，回覆亦唔係由警務處發出，提醒市民要小心登入虛假網頁或冒名群組。

警方籲小心虛假網頁

呢個民間專頁製作都幾認真㗎，頭像係「警徽」，封面相就用「警察招募」，相中有兩名「軍裝警員」，設立宗旨係「搞亂香港 使命必達」。雖然民間專頁只得幾百個like，無正版專頁超過3萬個咁多，但admin都幾勤力，開頁兩日已經出咗7個post，仲會回覆市民查詢𠻹。

有市民向呢個專頁查詢「七警涉毆示威者」單案查成點，「我處答覆」形容七警係「精英」，仲話喺偉大嘅中國共產黨領導下，七警會得到「愛國英雄」式對待。專頁強調唔會刪留言，「做事光明磊落」，仲話「香港警察 Hong Kong Police」先係「假冒」，嘲諷味道極濃。