【明報專訊】奧斯卡得獎紀錄片《海豚灣》(The Cove)令世人開始認識日本捕殺鯨豚問題，噚日係當地捕獵季節嘅第一日，來自世界各地包括香港嘅保育人士，陸續去到和歌山縣太地町展開保護行動，但過程就唔係咁順利。其中香港本來有3個人去，但兩個居港外國人攞唔到簽證，結果去唔成，只有《香港動物報》記者陳泰臣順利入境。

氣氛緊張 保育者遭監視質問

泰臣形容太地町氣氛緊張，當地警察、傳媒同村民都監視住佢哋嘅一舉一動。仲有日本傳媒訪問佢哋，質問佢哋去太地町做咩；另外警察話佢哋入超市唔畀帶電話，因為唔想佢哋影相喎。佢又話當地天氣麻麻，漁民都無出海捕鯨，但相信漁民遲啲會將海豚趕入海灣，喺暗角屠殺海豚。香港動物報又同Emily講，今次可以去日本做直擊報道，要多謝香港海豚保育學會資助記者買機票。

《海豚灣》主演者被捕

除咗香港代表，《海豚灣》嘅主演者、積極推動保護海豚計劃嘅Richard O'Barry都畀警察拉咗，理由係佢冇帶護照喺身。當地消息話O'Barry有可能被遞解出境，仲可能以後冇得踏足日本，聽講目前只有十幾名保育人士順利去到日本。