【明報專訊】新任私隱專員黃繼兒8月頭履新，噚日第一次同Emily等一班傳媒茶敘。公署準備咗唔少小食，黃繼兒同Emily講原來太太有份整咗春卷、蝦片同香腸等，認真賢淑。Emily問佢新工作咁忙，太太會唔會有怨言？佢就話趁上任前同老婆歐遊，順便探吓一班當年喺日內瓦聯合國人權事務委員會工作時認識嘅朋友。

唔講唔知，原來黃繼兒與喺今年1月上任嘅副專員黃錦卿，同樣之前喺律政署工作，相識多年。上任十幾日，黃繼兒話積極「惡補」資料，對保護個人資料都小心咗好多，如早排佢去買件新恤衫出席茶敘，但覺得太貴，職員就叫佢留低姓名、電話同電郵等個人資料，到時減價話佢知。黃繼兒就話得張白紙收集資料，冇任何條款，市民要小心。

對於近排外國關注Uber電召汽車程式或會追蹤乘客嘅位置，涉侵犯私隱，黃繼兒提到唔少應用程式同埋網頁嘅基地都喺外國，公署目前未必有法定權力跟進，會繼續同其他地方執法部門及機構交流同聯絡。講起呢兩日被黑客公開咗大量用戶資料嘅偷情網站Ashley Madison，黃繼兒笑語佢都係第一次睇到有關網頁，「原來咁嘅網站都存在，都幾有『新意』」，又話個人資料嘅定義應該不斷更新，以跟貼科技發展。