【明報專訊】立法會聽日舉行暑假前最後一次大會，今次大會有7條草案恢復二讀同三讀，包括有關抗戰勝利70周年公眾假期嘅《特別假期(2015年9月3日)條例草案》。無黨派黃毓民早前向秘書處就呢條條例草案遞交咗89項修訂，但立法會主席曾鈺成噚日裁定全部唔可以提出。毓民話其實早已「打定輸數」，提出修訂只想令公眾關注政府立法倉卒。 毓民：打定輸數 冀關注立法倉卒 曾鈺成解釋，毓民提出嘅每項修正案，係訂明以另一日期取代今年9月3日為額外公眾或法定假期，以紀念抗日戰爭勝利70周年以外事件。佢話，如果任何一項修正案獲通過，都會具有改變條例草案主題嘅效力，而毓民提出嘅修正案，亦全部同條例草案主題無關，所以不容許動議呢啲修正案。 曾：修正同主題無關 毓民話早料修正案會被否決，佢強調提修訂唔係想拉布，只係想大家諗吓，若抗戰勝利能無端端放假，日後盧溝橋事變等「係咪全部都可以放假？」
|
| |
| |
