【明報專訊】阿哥嘲跳船比喻「打得麻麻」 建制派議員喺政改表決「甩轆」事件餘波未了，當日有份「等埋發叔」嘅新民黨田北辰(田二少)，噚日就同阿哥、自由黨田北俊(田少)隔空互評。田北辰前日撰文打比喻話大部分船員團結努力修補因撞冰山而穿窿嘅船時，卻有8名船員登上救生艇，仲自鳴得意，令到33人搭沉船葬身大海。但當日留守會議廳投票嘅田北俊，就公開話個比喻「打得麻麻」，有邏輯問題，批評細佬嘅指摘荒謬。 田少噚日喺港台節目上形容話，當時泛民已經表明反對政改，就算「發叔」劉皇發趕得切投票，「架船都係沉㗎啦，跳船有咩好處呢？」認為正確比喻應該係「佢哋忽然間話跳船，架船咁大，我哋又唔知佢哋為乜跳船，咁有啲人跳，我哋決定唔跳，究竟邊個錯呢？」佢又形容細佬好慘，因為佢當時只係跟隊離開議事廳。 細佬再駁﹕在席唔投票都得 不過，田二少之後又回應阿哥話，只要唔夠過半數(35人)撳機投票，就算你坐喺會議廳都無所謂，即係就算有建制議員走唔切，只要大家集體唔投票，個結果一樣會不獲承認。但田少嘅理解就唔同細佬，田少話只要會議廳有過半數議員出席，投票結果就算數。 Emily搵番立法會議事規則，第17條第4款訂明，點名表決時，如「在席的議員人數(包括放棄表決者在內)顯示出席會議的人數不足法定人數，點名表決即告無效」，即係點票時嘅法定人數，係包括坐喺位、唔投票嘅「放棄表決者」，似乎田大少講法可能啱啲。 重提楊啟彥事件 周梁撐大少 自由黨周梁淑怡都插嘴，喺facebook留言撐田北俊，話「田北辰由當日反臉不認人，拒認(九鐵前總裁)楊啟彥是他的朋友，到今天顛倒是非，竟然將自己的出錯說成哥哥的不是，作風如一，相信大家可以由此看清楚田二少到底是怎樣的一個人！」
|
| |
| |
;){kind=small}
;){kind=small}
