【明報專訊】推廣跑步活動嘅「香港街馬@2015」，將於9月6日(周日)喺中環海濱舉行，活動至今有約8000人報名參賽，當中不乏議員同政商領袖響應。據Emily了解，報咗名嘅議員有泛民有建制，包括陳恒鑌、馬逢國、陳偉業、何秀蘭、張國柱，張超雄則同輪椅人士參加猛龍傷健二人組。 陳家洛原先想同兩個千金參加大會5公里賽事， 但賽例最低年紀要求係21歲，所以家洛無得玩家庭跑。商界都有唔少人參加，恒隆地產關則輝會同媽媽孖咇走3公里賽事，鼓勵長者齊齊參與。 馮康與阿女跑兩場 醫管局前新界東聯網總監馮康就好勁，同阿女連氣跑兩場，早上8點先孖咇步走3公里，9點再跑森林跑5公里賽事。 街馬活動喺九龍東搞咗兩屆，本來打算推廣至港島，原定今年3月喺中環搞，但去年底籌備活動時，大家都知道中環發生緊乜嘢事，咁點樣申請中環場地呢，所以主辦單位將活動推遲到9月，揀咗周日舉行，屆時「佔領」海濱一帶路面，都應該影響唔大嘅。
|
| |
| |
