【明報專訊】噚日政改表決呢個咁關鍵嘅時刻，有31個建制派議員臨時離場，搞到政改大比數否決，經民聯林健鋒事後解釋話要「等埋發叔(劉皇發)」。事件引起網上熱論，一地「花生碎」，唔少網民迅速改圖改歌，facebook上仲即刻出現咗一個名為「等埋發叔」嘅專頁，噚晚深夜已有近1萬個like！ 專頁近1萬個like 個專頁上載咗唔少改編歌詞，包括將容祖兒首《不容錯失》改成《等埋發叔》﹕「聽清楚 等埋發叔 講清楚 等埋發叔 可不可 聽聽泛民 否決如何」；又將陳奕迅首《他一個人》改成《叔一個人》：「他有票 也不去投票 他怪我 要等我投票 否決了 記得那時間 路上最塞車。」 唔少網民發揮創意，整咗唔少改圖，包括將政府宣傳政改口號「2017 一定要得」改成「2017 等埋發叔」；網民又將中國足協諷刺港隊「有層次」嘅海報，改成「有反對，有支持，有離場 這麼有層次的建制派」。 網媒《仙人掌》就將八九學運期間，時任總書記趙紫陽探望絕食學生時，含淚說「來晚了」嘅相片，改成發叔拎住咪話「對不起，我來晚了！」。 網民又指自由黨全體議員留低，令表決時刻不致流會，就好似踢波「包越位」咁，不過無睇開波嘅網民就投訴睇唔明喇。 譚sir叫錯發叔做黃宏發 另外，民建聯譚耀宗向記者解釋事件時亦有蝦碌，唔小心叫咗「發叔」劉皇發做前立法局主席黃宏發；而喺下晝記者會上，林健鋒口快快，想講投反對票嘅28人，除咗泛民外，仲有一票係醫學界議員梁家騮，但林健鋒叫咗人做「劉家騮」！
|
| |
| |
;){kind=small}
;){kind=small}
