【明報專訊】立法會拉布噚日終於進入表決階段，可能見大家悶悶哋，大樓噚日就上演「火警鐘誤鳴」戲碼，消防警報突然喺下午約1點22分啟動，會議即刻暫停，在場嘅人包括議員同正出席會議嘅教育局長吳克儉，都要疏散到大樓地下。吳克儉話，覺得大樓內嘅人「走火警意識很強」，係咪議員「太惹火」呢？局長話「大家都是跟程序，議員個個都是跟程序」。 昨早已曾警鐘誤鳴 現場所見有消防員到場，據聞噚日朝早大樓已經試過「火警鐘誤鳴」，所以議員其實都唔係走得好快。至於較少開會嘅醫學界議員梁家騮，更係啱啱先返到立法會。 至於會唔會擔心今次誤鳴會浪費審議預算案嘅時間呢？吳局長話今次係意外，但時間真係好寶貴。 立法會秘書處話，消防員喺下午約1點26分到達大樓，經調查後確定無火警發生，至於警鐘誤鳴原因就有待確定嘞。
|
| |
| |
;){kind=small}
