【明報專訊】涉及2017年特首選舉嘅政改工作開始進入草擬法案階段，遲啲就要到立法會闖關。政改三人組主帥政務司長林鄭月娥，噚日下晝去咗民建聯一個支部嘅新春酒會，佢致辭時話，喺大年初一為港人祈福時，寫咗「政通人和」四個字，佢仲講咗句心底話，話發夢都諗住政改方案可以喺3、4個月後獲得立法會通過。立法會主席曾鈺成就祝賀林鄭「心想事成」！

噚日雖然係星期日，林鄭月娥都馬不停蹄，除咗下晝去咗民建聯活動外，一大朝早佢就去咗沙田白石角海濱長廊(前右二)，同公益金執行委員會主席郭少明(前左二)及其他嘉賓，為香港公益金舉行嘅「新界區百萬行」主持開步禮，為公益金資助嘅「家庭及兒童福利服務」籌款。

噚日嘅百萬行有工商機構、社區團體組成超過150支步行隊伍，加埋個人參賽者，有超過1.2萬人參加，亞視同新城更組成傳媒隊為公益金籌款。

(政府新聞處)