【明報專訊】西九管理局又有新搞作，今次邀請咗有份參與第55屆威尼斯藝術雙年展個展、香港藝術家李傑，喺土瓜灣牛棚藝術村舉辦視覺展覽，延續佢喺威尼斯個展嘅內容，主題係「你。」。Emily比較印象深刻嘅裝置，係播放其中一段影片，講一個人幫緊另一個人搽緊灰色指甲油嘅close-up，配合埋現場幽靜嘅氣氛，有令人心寒嘅感覺。李傑話，希望營造一個大構圖，勾起番對香港生活嘅思考，而對佢嚟講係「有平靜，又有憤怒」。

用日常物件影像聲音表達

Emily噚日率先參觀展覽，李傑運用咗牛棚嘅空間，透過日常生活見到嘅唔同物件，以及影像、繪畫、聲音嘅互相交錯擺放，營造一種情緒或感覺，以及表達藝術家嘅個人睇法，例如有個地方放咗一個更亭，更亭入面擺放咗杯等其他物品，透過光線角度營造一種生活嘅痕迹；又例如另一個位，地下無秩序地擺放咗一堆喇叭，每部都播放唔同音樂嘅前奏，透過聲音相撞產生異樣感覺。

展覽會今日起直到下月13號，費用全免。西九管理局現場會向參觀市民派發一本小冊子，除咗營造展覽氛圍外，小冊子入面特登設有多頁空頁，希望觀眾可以記錄自己睇完展覽後嘅感受同回憶。