【明報專訊】學民思潮成員等6名公眾人物，上周喺立法會公聽會離席請願，被保安帶走，其後引發保安扣留嘅質疑，立法會行政管理委員會噚日討論事件，立法會主席曾鈺成話，立法會《權力(及特權)條例》訂明任何人打斷會議都係犯法，保安員當日發警告信都係善意提醒，最終6人都無簽署信件便可離開，所以不存在扣留。不過，佢話行管會將檢討指引，以免產生誤會。
曾﹕無扣留 發警告信善意提醒
曾主席話行管會好重視事件，強調當日保安跟從嚴格指引處理，話保安員有必要向佢哋宣讀警告信內容，要求對方簽收。曾鈺成又拋出法例，話立法會職員具警務人員嘅權力和特權，但絕不輕易運用權力，今次處理亦與過去相同。曾主席仲話，有議員建議將特權法條文貼喺議會當眼處，等出席者知道違例後果；又有人建議日後入立法會嘅公眾人物要核實身分。
學民成員﹕保安話係「衰仔紙」
不過，學民成員黎汶洛就唔服氣，話曾鈺成嘅講法並非事實嘅全部，強調當日被「扣留」1小時，保安喺最後10分鐘先提出警告信一事，當時更以「衰仔紙」形容有關信件，又話當時保安攔住房門，認為舉動已構成拘留。
