【明報專訊】「2013香港商界最關注的十件大事」噚日新鮮出爐，政府推出3項樓市辣招同「佔領中環」分別成為頭兩項商界最關注嘅大事。不過財政司長曾俊華就話，佢心目中嘅新聞大事唔喺榜上，財爺最關注嘅係佢做咗財政司長6年，舊年第一次喺財政預算案審議階段遇上「拉布」。佢呼籲議員今年唔好再拉布。

財爺籲財案勿再「拉布」

財爺喺頒獎禮時，仲多謝同場嘅立法會主席曾鈺成，話多得佢精明嘅決定(剪布)，最後先可以安全度過。新一份預算案下月底公布，財爺乘機呼籲議員唔好再拉布，叫大家「花少啲時間喺政治角力上，多喺時間做務實嘅工作」。

呢項評選由《香港商報》舉辦，主辦單位話喺一個月內收到超過6萬封來自香港、內地同其他地方讀者嘅投票，頭3位分別係「徵3D印花稅 冷卻炒樓不減辣」、「佔中損香港經濟 八商會聯署反對」同「三中全會召開 中國改革開放新里程」。