【明報專訊】建制派喺區議會選舉中兵敗如山倒，但佢哋喺新一年似乎戰意高昂，民建聯同工聯會噚日都喺facebook出片表明會繼續服務市民。民記亦準備喺18區成立「監察議會」平台，密切監察區議會運作，發揮「在野黨」嘅角色。黨主席李慧琼(Starry)話，雖然地區辦事處少咗，但團隊會繼續走到街上，喺馬路前為大家服務，「一張枱一張櫈，就足以延續我哋嘅社區服務工作」。

「辦事處少咗，一枱一櫈就夠」

工聯會立法會議員麥美娟(Alice)同黨友陸頌雄都喺區選落敗，唔再係雙料議員，兩人聯同該黨新西團隊拍片，大家喺片中玩二人三足，Alice拍住陸頌雄一齊行，過程中Alice跌倒、起番身，象徵佢哋嘅團隊喺邊度跌倒就喺邊度起番身，強調來年會再接再厲，繼續服務市民。

民建聯就拍片表明服務市民初心不變。Starry話，民建聯走過艱難嘅一年，雖然無咗區議會議席，但團隊無散、服務市民嘅初心亦堅定不變。Starry話未來會更堅強、更勇敢地守護一國兩制，並透露會喺18區成立「監察議會」平台，監察新一屆區議會運作，發揮好「在野黨」嘅角色。

中西區將會率先推行「監察議會」平台，喺區選中落敗嘅民建聯副主席陳學鋒同Emily講，平台主要監察當區區議員有無遵守《基本法》及區議會條例、有無濫權同濫用資源等。佢話會吸納市民及唔同黨派嘅朋友加入平台，一齊監察區議會。