【明報專訊】政務司長張建宗噚日帶領一眾官員到立法會，回應教育界立法會議員葉建源提出「立即平息民憤的緊急措施」嘅急切質詢。張建宗答嚟答去都係講番特首林鄭月娥喺9月初提出嘅4項行動，同埋警方執法行動係回應犯法行為，令建制派如工聯會郭偉強、經民聯林健鋒等批評佢無提出「止暴制亂」嘅具體方法，郭偉強話，「希望佢(張)留意，我擔心佢嘅回應可能會令民憤更嚴重」。張建宗反駁，政府有做具體措施，「可能大家善忘」，唔記得政府做咗兩輪中小企支援措施，同埋開學津貼等紓民困措施。 郭偉強憂回應反激化民憤 郭偉強話，打工仔呢兩日被迫罷工，返唔到工、返唔到學，可以預期飯碗可能不保，「決心你(政府)有好多，但要有實際方法先得嘅」，問政府究竟有咩實際行動盡快止暴制亂。張建宗話，知道市民怨聲載道，「止暴制亂係大家夢寐以求」，至於有咩可做，佢話政府有同各界溝通，唔係門面工夫，因為今次政府好大教訓，喺施政方面要虛心聽唔同階層背景嘅意見，又話自己都有落區。 郭偉強參選東區區議會和富選區，對手有陳嘉陽、林斯嵐。
|
| |
| |
;)
