【明報專訊】通識科近日再度成為焦點，經民聯立法會議員梁美芬早前提到通識科冇教好學生品德，理工大學校董會嘅學生代表李傲然(Owan)噚日就向佢「下戰書」，希望一齊挑戰通識科公開考試，不過，梁美芬就向傳媒表明唔會答應Owan嘅邀請。
Owan噚日喺facebook提到，梁美芬喺公開場合對通識教育有不同程度批評、指通識教育令年輕人對國家了解「離心離德」，佢作為經歷過通識教育公開試洗禮嘅大學生，希望邀約梁美芬作答同一份通識教育試題，一決高下。梁美芬已經回絕，話唔會答應呢啲「枝枝節節」嘅活動，但歡迎Owan觀看佢過往嘅立法會公開發言、撰寫文章及短片。
Owan同Emily講，認為梁美芬拒絕邀請係對課程缺乏認識、唔敢接受挑戰，建議對方可以參考回歸前通識科試題，當中唔少都係同中國議題、身分認同有關，唔存在通識教壞年輕人。
;)
