【明報專訊】上月發表嘅《審計報告》批評港台電視31收視率低，節目雜項多、不斷重播，吸引力低；前日立法會上更有建制派議員批評港台部分節目「偏頗」，問政府有無扣人工或發警告信，以處罰員工。不過，由港大民意研究計劃做嘅電視節目欣賞指數顯示，今年7月至9月期間，喺個別電視台嘅整體節目平均欣賞指數方面，港台位居榜首，仲高分過ViuTV同無綫電視！ 港大民意研究計劃噚日公布「電視節目欣賞指數調查」第三階段結果，喺個別電視台嘅整體節目平均欣賞指數方面，港台以69.95分稱冠，ViuTV、無綫電視、奇妙電視分別有67.65分、65.86分同64.8分。 新聞節目指數有線第一 至於入選「十大」嘅節目，有6個都喺港台播放，除咗第二嘅《鏗鏘集》，仲有《香港故事》、《警訊》、《五夜講場—文學放得開》、《頭條新聞》、《五夜講場—真係好科學》都入選十大。至於排第一位嘅係無綫嘅《長命百二歲》，第三係ViuTV嘅《經緯線》。新聞財經節目整體欣賞指數方面，有線電視排第一，now寬頻電視第二，無綫電視排第三。
|
| |
| |
;)
