【明報專訊】公民黨黨魁楊岳橋(AY)近日收到唔少學生來信，不過唔係有少男少女搵佢訴心聲，原來佢發起「AY讀書會」，等有興趣嘅同學寫信同佢分享閱讀心得，8月底仲會搞個見面會，同大家一齊分享閱讀。AY同Emily講，佢一直好想搞同閱讀有關嘅事，自己本身都鍾意睇書，亦希望鼓勵大家睇書咁話。

揀中文書贈同學

AY早前喺Instagram出post，話趁暑假希望邀請10個升中四以上嘅學生、10個升大四以下嘅同學，搞個讀書會，佢形容活動「費用全免」，除咗要花兩蚊郵費寄信畀佢。呢個活動，AY係希望有興趣嘅同學仔寫信去佢立法會辦公室，講吓睇緊咩書或閱讀心得，佢之後會郵寄番一本書送畀同學，8月底同大家喺見面會時討論。

AY未有透露會揀咩書送畀同學仔，但會揀中文書，希望先透過同學仔嘅信，睇吓大家係乜嘢程度，再揀本大家都睇得明嘅書送出去。