【Emily】「識於微時」 鄒幸彤記得邵家臻30年前數白欖
[2022.12.22] 發表
【明報專訊】前支聯會副主席鄒幸彤(阿彤)被控煽惑他人明知而參與未經批准集結罪罪成，後來上訴得直罪脫，但因有其他案件仍遭還押。立法會前議員邵家臻噚日去探訪阿彤，並喺facebook交代佢嘅近况。邵家臻話，阿彤冇諗過會上訴得直，現正全心預備支聯會拒交資料案，將會繼續自辯。邵亦提到，阿彤喺獄中唔想浪費時間，「只貼信封未免太無聊」，預備上庭之外，亦自學韓文同日文。
獄中自學韓文日文
阿彤透過邵家臻轉述，佢已經陸續收到聖誕卡，但提醒大家唔好過分集中喺佢身上，仍然有好多人喺監倉，希望大家唔好忘記佢哋。邵家臻話，還押中嘅阿彤一直冇食「私飯」，「一來價錢貴，二來她對食物要求低」，見佢清減唔少，但佢仲講笑話，要再瘦到有馬甲線。
探訪期間阿彤突然問起，1992、93年支聯會聖誕同六四集會「數白欖」表演者係唔係邵家臻，邵聽見即被「殺個措手不及」，話當年自己大學畢業，阿彤應該只得8、9歲，可能第一次出席六四集會，「佢竟然記得我！那麼我們算是識於微時吧！」
更多港聞
【Emily】經民聯逛工展會 梁美芬盧偉國同喜鹹蛋魚皮
【明報專訊】一年一度嘅工展會正在維園舉行，立法會主席梁君彥同埋盧偉國、梁美芬、吳永嘉等經民聯議員噚日（21日）一齊去掃貨，藉此機會支持本地展... 詳情
【Emily】律師會嘉許禮 彭韻僖所寫歌曲獲獎
【明報專訊】香港律師會喺上個星期一（12日）舉行咗「公益法律服務及社區工作嘉許計劃」頒獎禮，嘉許熱心提供公益法律服務嘅律師同律師行。呢個計劃... 詳情
相關新聞
