【明報專訊】捐1蚊會變2.2元？長江集團又開水喉，喺今個星期六(5月20日)《萬眾同心公益金》電視籌款節目再次啟動長江捐款熱線，搞配對捐錢，打出「您捐幾多 長江集團配對捐120%」旗號，即市民出1蚊，長江集團加碼再出1.2元，全數畀「公益金及時雨基金」，變相公益金會收到2.2元，希望市民為善不甘後人，慷慨解囊。 長江集團搞配對捐錢唔係第一次，不過，今年撞正香港特區成立20周年，長江集團今次特別提高配對捐款比率，即配對公眾經長江捐款熱線認捐嘅100％金額外，再額外多捐20％。長江和記集團聯席董事總經理李澤鉅日前更嗱嗱聲，代表長江捐出120萬元做首筆配對善款，已經將支票畀埋香港公益金籌募委員會聯席主席李業廣，希望幫到更多有需要嘅香港人。 「公益金及時雨基金」主要幫身陷困境嘅人或家庭，提供短期過渡援助，咁多年來幫咗5.1萬人，如果大家都想出一分力，記得星期六撥個輪到長江捐款熱線喇。
|
| |
| |
