【明報專訊】青衣長康邨康美樓早前爆出兩個住唔同樓層、同屬A07單位嘅住客確診新型冠狀病毒肺炎，同座A07單位居民即晚要疏散去檢疫中心。事隔約3星期，特首林鄭月娥噚日同運輸及房屋局長陳帆等政府人員去康美樓視察，其間無上樓同居民傾偈，逗留不足半個鐘後離開。

大堂同保安清潔工傾偈

政府出稿話，林太去到長康邨與房署、民政事務總署及警務人員見面，了解佢哋上月疏散單位住戶、協助衛生署調查感染源頭，以及執行一連串感染控制措施嘅行動經驗。林太之後去咗康美樓地下大堂同保安、清潔工人傾偈、握手，感謝佢哋嘅服務，離開時被傳媒問到點解唔上樓，未有回應。林太喺大廈視察時，就有市民大叫「五大訴求 缺一不可」、「民意叫你落台」等抗議口號。