【明報專訊】闊別巿民4年、之前動工翻新嘅香港藝術館,喺舊年11月重開。擴建後嘅藝術館以全新形象示人,館藏超過1.7萬項,負責工程嘅建築署噚日介紹新館建築特色,建築署建築師劉偉健話,新藝術館外牆主要以水泥纖維板製造,從遠處睇好似一排排長形方塊,透過獨特嘅組裝方法,營造凹凸效果,有助隔熱之餘,亦令外牆喺唔同日照下,產生好似波浪嘅形態。佢話外牆設計概念源自維港嘅海浪,以突顯藝術館位處維港旁邊嘅特色。
擴建後嘅藝術館增設多個入口,建築署高級建築師馮慧雯話,藝術館嘅主入口由以前1樓遷至地下,1樓改為接待大堂同多功能廳,可舉辦專題展覽同文化活動;地下亦增設3個出入口,其中一個仲連接星光大道。而以前每層嘅茶色玻璃,則改為透明落地玻璃,令到藝術館更加通透明亮。佢又話,館內展覽空間由以前7000平方米增加到1萬平方米,展廳亦由7個增至12個。
天台改建新頂層 增兩展館
馮慧雯話,藝術館有高度限制,今次設計將原先嘅天台改建為新頂層,增加兩個展館,並特別選用夾層玻璃同夾絲網,以反射紫外線,令市民欣賞展品時唔會受太刺眼光線影響。