【明報專訊】政府噚日正式刊憲，公布11月25日舉行嘅九龍西立法會補選有5名候選人獲有效提名。5個候選人當中，原來得服務九龍西多年嘅馮檢基唔係當區居民，佢喺提名表上填嘅主要地址?火炭。獲建制派支持嘅陳凱欣原來住九龍城書院道、李卓人住美孚，早前喺商台選舉論壇多次關注美孚議題嘅曾麗文則住又一村。至於自稱「劏房阿哥」嘅伍廸希則報住深水埗基隆街。
政府亦將各候選人嘅簡介上載至補選網站，李卓人政綱上強調自己係「民主派唯一支持候選人」，聲稱為反欽點而出選嘅馮檢基就印咗口號「撐住 重新好起來！」落政綱，並無提「反欽點」。陳凱欣喺「政治聯繫」一欄留空，繼續「欣為您 突破界限」；伍廸希話自己堅持反港獨、實施全面租管等；曾麗文政綱係各候選人中最長嘅，話自己參選係「背負反地產霸權使命」。
選舉事務處發言人話，補選設有73個一般投票站同最多22個專用投票站，畀48.7萬名已登記嘅當區選民投票。投票時間由當日上午7點半開始，至夜晚10點半結束。
;)
