【明報專訊】「雙學三子」之一嘅學聯前秘書長周永康(Alex)日前獲准保釋等候上訴，Alex喺佔領運動之後開始學佛，噚日就有報章指周永康因為篤信佛學，已改名「釋永康」。Alex就澄清自己「仍然跟阿爸姓」。

Alex近年學佛，講嘢仲愈嚟愈玄，因此佢身邊嘅朋友都幫佢改咗個花名叫「釋永康」或者「佛康」。點知有報章以為Alex真係改咗名，指「在獄中研讀佛學的周永康跟隨釋迦牟尼，改名釋永康，成為佛教徒」。Alex噚日接受商台節目《在晴朗的一天出發》時，透露自己喺監獄學佛，有密集時間了解同思考自己點樣可以變得更好，希望成為一個清醒同覺醒嘅人，但澄清未有改姓，笑言「我都係跟阿爸姓」。

爭改善囚犯待遇 懲署有回應

Alex透露，喺監獄中食營養餐，笑言瘦咗3至4公斤，又話喺獄中爭取改善囚犯待遇，例如多次詢問訂立營養餐嘅標準係乜，以及詢問點解囚犯要「踎班」，即蹲下來等候點名；之後「踎班」就取消咗，唔知同爭取有無關。

懲教署就好認真發聲明回應，強調署方喺積極鼓勵在囚者參與各類型嘅更生計劃同時，必須平衡保安風險同院所嘅運作情况等特殊因素，制定合適制度，預防獄內嘅非法違紀行為，並以公平、合法同合理嘅原則，確保每名在囚者獲得適當待遇，仲話膳食嘅標準分量同營養成分均由合資格營養師釐定，並獲衛生署認可。