【明報專訊】中央政府駐港聯絡辦公室噚日發文，Emily先知道中聯辦主任張曉明喺上周五去咗深水埗大南街，探訪以社企形式運作嘅餐廳「北河同行」，仲同老闆明哥(陳灼明)坐低吹吹水。明哥話畀Emily知，張曉明臨走時送咗張自己寫嘅字幅畀佢，明哥話會喺舖頭搵位掛起佢，仲話「北河同行」好「中立」，「美國領事嚟時張相我都會裱起佢，最緊要集合大家嘅愛心，無鬥爭」。

明哥﹕美領事張相都會裱起

張曉明去探「深水埗明哥」當日，適逢明哥生日，明哥事後同Emily講，嗰朝有幾個「科長」去舖頭，問佢下晝得唔得閒，之後無耐張曉明就出現，話想了解多啲有關「北河同行」嘅事。明哥話張曉明買咗杯奶茶，同佢傾咗半個鐘頭偈，了解免費派飯服務點運作，又講吓近日颱風襲港，佢哋點用手推車送出約200個飯盒畀長者同露宿者。張曉明臨走時送咗寫住「為善最樂」嘅字幅畀佢做生日禮物，為明哥打氣。

明哥話張字幅好大吓，有1米幾長，𠵱家搵緊個框裱起佢，將來會掛喺舖頭。Emily睇番舊年張曉明一幅差唔多大小、寫住「度德而處」嘅書法，喺民建聯籌款晚宴上就籌得1880萬元，睇嚟明哥真係要好好保管好呢幅墨寶先得喇。