【明報專訊】立法會前主席曾鈺成噚日撰文講民主黨林子健事件，以3個茶客嘅對話，評論事件並對警方「抽水」，指反對派借林子健事件抹黑「一地兩檢」、質疑內地公安跨境執法；但同時質疑警方之前調查「銅鑼灣書店(即李波事件)」同「四季酒店事件(肖建華事件)」時，無今次咁效率神速，兩件事至今都未知道真相。 質疑李波案肖建華案調查慢 曾鈺成喺《AM730》撰文，以茶客甲、乙、丙嘅對話評論林子健事件。茶客甲認為林子健嘅故事太唔合情理，只係拎咗一張球星相片，話要託支聯會送畀劉霞，如果只係咁樣內地「強力部門」就要派幾個人嚟香港，喺鬧市將佢擄走，「咁『強力部門』豈不是『好唔得閒』？」 不過，茶客乙就覺得有受害人向政治人物求助、再開記者會，係政治人嘅本能，更何况受害人係黨友。茶客乙亦話，先前發生咗銅鑼灣書店同四季酒店事件，好難怪市民會相信內地公安會嚟香港跨境執法。 茶客丙就不滿反對派「反中亂港病毒上了腦」，乘機抹黑「一地兩檢」。茶客丙話，如果唔係警方偵查有效率，反對派就會拎林子健事件、「銅鑼灣書店」同「四季酒店事件」不斷炒作。茶客乙問，咁點解先前兩件事，「警方偵查為什麼又不見得效率神速？」
|
| |
| |
;)
