【明報專訊】工聯會陸頌雄同鄧家彪都算勤力，踏入2017年已經連續兩日開記者會講有關消費者權益及勞工權益事件，噚日講政府外判工欠監管，陸頌雄仲搞埋facebook live直播，但佢就擺咗烏龍，唔知係咪助手擺錯機呢，結果個直播畫面變咗「打橫」，睇佢嘅直播要側晒頭先得。其實，陸頌雄都唔係第一個蝦碌嘅議員，早前公民黨譚文豪都試過同樣情况。

講番個記者會，陸頌雄話佢哋收到求助，唔同政府場地嘅外判前線員工反映，話所屬嘅承判商完約而未能續約，佢哋嘅權益亦因遣散而受到影響。佢話工友常見難題，包括有唔少承判商唔願意支付遣散費，有工友就因交接問題被扣減工資。

佢仲話，發現政府唔同部門對投標承判商喺維持原有工友薪酬水平嘅事上處理不一，有工友留番喺原有場地工作，但同新外判公司簽新約，薪金假期反而少咗。佢仲點名要求同房署討論外判合約員工權益問題，又鬧政府部門無做好監察角色監管外判商。