【明報專訊】香港大學噚日宣布，將向5名傑出人士頒授名譽大學院士銜，表揚佢哋對大學同社會嘅貢獻，Emily發現，名單上有幾個人係校務委員會成員或前成員，經歷過法律學院前院長陳文敏被否決出任副校長嘅風波。 呢幾個校委包括創興銀行副主席兼董事總經理梁高美懿，佢被前學生會長馮敬恩指，喺審議副校長任命嘅校委會會議上，批評陳文敏未獲任命就公開自己係唯一候選人，操守有問題；名單上另一校委係經民聯石禮謙，佢曾經向泛民承認，有投票支持「等埋首副」先至審議陳文敏任命。 陳文敏同法律學院副教授戴耀廷都曾捲入捐款風波，校委會曾委託審核委員會調查事件，由本身係資深會計師嘅校委黃啟民做審委會主席，佢今次都有份拎院士；另一獲頒院士銜嘅前校委係資深傳媒人文灼非。佢兩個當日投票時係咪支持陳文敏做副校，港大人有唔同揣測。 今次院士名單上，唯一無同陳文敏事件扯上關係嘅係港鐵主席馬時亨。佢哋都會喺9月28日(星期三)於港大接受院士銜。港大學生會會長孫曉嵐話，需要開會討論係咪對今次院士頒授作出抗議，但過往學生會就算獲邀出席院士頒授典禮，都唔會出席，因為佢哋唔認可遴選得主嘅機制。
|
| |
| |
;)
