【明報專訊】晚宴遲開始 嘉賓打喊露

全國人大委員長張德江噚晚出席會展嘅晚宴，係佢訪港3日嘅重頭戲，張德江喺發言中刻意大談本土，演辭滲入香港「本土」語言，並引用《獅子山下》歌詞「放開彼此心中矛盾，理想一起去追」嚟勉勵香港人。呢句歌詞大家耳熟能詳，Emily翻查資料，原來係同2002年時任財政司長梁錦松喺預算案嘅結語一模一樣。阿松噚晚亦係座上客，唔知張德江呢番對政商界嘅發言，對被視為參選特首黑馬嘅阿松有無弦外之音？

晚宴獲邀嘅400多名政商界名人噚晚未到7點已乖乖按安排入場，不過由於張德江先喺樓上酒會見立法會議員，晚宴遲咗半個鐘都未開始，平日唔使等人嘅「大孖沙」及長者嘉賓都要坐定定，而現場直播鏡頭就掃向各枱賓客，唔少人悶樣畢露，有人「打喊露」，有人玩手機。

晚宴獲邀者唔少得大商家，地產界包括李嘉誠長子、長和副主席李澤鉅，李兆基之子、恒基地產副主席李家傑，以及嘉華國際主席呂志和、新世界主席鄭家純、九龍倉吳光正等。

陳方安生殷曉靜同枱密斟

至於座位安排，部分配搭亦有趣，好似前政務司長陳方安生嘅隔籬係中聯辦副主任殷曉靜，但見兩名女士都幾好傾；英國駐港總領事吳若蘭隔籬係民建聯立法會議員葛珮帆，葛珮帆仲同吳若蘭、賭王女兒何超瓊等人合照；民建聯蔣麗芸就獲安排同爸爸工業家蔣震坐埋一齊。兩名新舊「第一夫人」梁振英太太唐青儀及董建華太太趙洪娉，就與基本法委員會副主任梁愛詩共坐主家席，喺等候時有講有笑。

張德江噚日大談本土，其中一句大家可能似曾相識，事關早前民建聯鍾樹根已用咗類似句語(月是故鄉明，要本土不要分離)賣廣告，樹根噚日立即上載晚宴圖片同埋委員長呢句到facebook，似乎對自己「早着先機」好滿意。