【明報專訊】《2014年版權(修訂)條例草案》目前仍喺立法會審議，上星期嘅四方會議無功而還，「鍵盤戰線」發言人鄺頌晴透露，未來一個月可能會就版權條例提交一個新方案，但目前仍在蒐集資料，因此未有具體內容可以提供。「鍵盤戰線」都好活躍，成員下個月會去美國矽谷出席一個研討會，講香港版權條例嘅情况，以及希望吸收外國經驗。

噚日多個傘後政團同公民組織一齊召開聯合發布會，公布來年大計。除咗鍵盤戰線，青年新政、東九龍社區關注組、慈雲山建設力量同荃灣民生動力等組織都有派員出席。當中唔少組織嘅成員曾經參加去年區議會選舉，最終雖然未有當選，但佢哋繼續喺地區工作，關注區內民生事務如巴士線重組、監督當區區議員同舉辦節日活動等，最重要就係展開鼓勵選民登記活動。

「普教中關注組」：或「狙擊」教局官員

「普教中學生關注組」都有代表出席，話未來可能發起「狙擊」教育局官員行動，要求官員回應，亦會喺立法會選舉期間要求候選人就「普教中」表態，務求將「普教中」議題帶入公共討論層面。