【明報專訊】年底就係區議會選舉，有建制派議員指市民不滿佔領行動，聲言若聽日即刻區選，泛民會輸到「趴喺度」，不過，民主黨主席劉慧卿噚日喺新春茶敘時就話，佢落區同市民拜年時，大部分市民反應都非常好。但副主席尹兆堅就話區選目前仍有變數，但唔會比上屆選情差。

尹兆堅：新興「傘兵」增變數

尹兆堅話，民主黨今屆區選計劃派出約100人參選，當中40多人為現任區議員，具體有幾多新人出選則要視乎各人考勤表現。尹兆堅話區選仍有變數，好似佔領運動後，出現唔少新興團體有意派「傘兵」出選，同泛民仲有「撞區」，最後或者會出現兩泛民候選人對一建制候選人嘅「三腳櫈」情况，但佢認為大家都無惡意，可能係有人選擇喺自己居住地區參選，而無評估整體大局，泛民會繼續協調。

工黨喺沙田區亦有同「傘兵」撞區嘅情况，初步統計目前至少有4個撞區情况，分佈中西區、油尖旺、沙田等地至少4個細選區。工黨副主席譚駿賢話，佢哋同「傘兵」組織「沙田新幹線」喺廣源、廣康選區都有撞區情况，兩名「傘兵」本身都係該屋邨居民，佢哋會繼續同「傘兵」做好溝通。