【明報專訊】以熟悉政策見稱既教育局副秘書長葉曾翠卿今日退休喇。葉太日前同記者臨別聚會時話，希望退休後可以持續進修，去申請持續進修基金嘅1萬蚊津貼，學好普通話，因為佢講廣東話同英文都算字正腔圓，希望普通話都可以達到咁嘅水平。

葉太仲話希望以後學吓跳健康舞同耍太極，以及感受吓唔使畀鬧鐘嘈醒嘅幸福。佢形容做教育政策好大壓力，因為市民鍾意畀意見，家長又望子成龍、要求高，有時教育界啲「炸彈」連環爆發，其他人都話佢「黑仔」，不過佢就反而覺得自己好好彩，「係真實嘅考驗，幫助我成長」。

葉太話，做官千祈唔好怕蝕底、乜都話唔關自己事；面對批評要處之泰然，搵機會解釋番。她仲話，喺政府做咗35年教育政策，今生無悔，交接時都好唔捨得免費幼稚園教育政策。記者知佢啱啱「升呢」做奶奶，話第時可能見到佢去幼稚園排隊報名，就要用另一角色親身去體會教育政策啦。