【明報專訊】上屆政府嘅新聞統籌專員何安達(Andy，圖)轉行做公關後，好少面對傳媒，不過，佢噚日接受港台節目《中國點點點》訪問，就講到特首梁振英早前同菲律賓總統阿基諾三世喺印尼峇里嘅會面。Andy話，對當時做法「好難批評」，因為明白官員係好多限制，但就有兩點若果政府可以「即刻反應」，就會可能好得多，但佢又話不過咁樣亦可能有反效果咁話。

Andy話，當日會面，特首同兩名官員擠喺一張小梳化，若果呢兩名官員、特首辦主任邱騰華或特首私人秘書陳嘉信能夠有即時反應，寧願企都畀特首坐得舒服啲，咁就畀人感覺有所不同；而當時官員見到菲律賓方面有人攝影，若港方人員拎iPhone出嚟，自己都影番張相畀新聞處同事，事後或者有唔同結果。

Andy話，呢啲官式場合，有時好在乎官員「一念之差」，好靠經驗，但一般情况下，官員會面嘅地點、座位、點握手等細節，已經一早定咗。

自爆做記者跟過周融

另外，Andy又提到入行做《英文虎報》嗰陣，原來跟過周融，當時周融係總編輯，成日考員工，例如會問佢哋近排最有印象嘅新聞。Andy話，當時佢答周融，話學生時代做過專上學生聯會，曾經隨團上京，仲同中央領導人胡耀邦同枱食過飯，又記起有一單新聞，話係胡耀邦用刀叉食飯咁講。