【明報專訊】話咁快聖誕節下個月就到，各類聖誕活動開始殺到嚟，一年一度喺瑞典舉行嘅「國際聖誕老人運動會2013」過多兩個幾禮拜就開始，為咗選出今年嘅香港代表，噚日舉行選拔賽，參賽者要喺觀眾面前大玩狂牛競技、禮物運送等。雖然破紀錄有兩名女姓參加，但最後由27歲嘅男聖誕「老人」陳柏圖勝出。 港5年贏過金銀銅 香港喺呢個人稱「聖誕老人奧林匹克」嘅運動會成績斐然，過去5年贏過一金、一銀、一銅。呢個奧運會絕非一般運動會，12個比賽項目聖誕氣氛濃厚，噚日嘅選拔賽，選出其中5款項目，測試9名參加者。 Emily噚日去現場睇，見到呢班「聖誕老人」又要騎瘋狂牛牛，又要戴圓錐筒面罩模擬爬入煙囪送禮，現場氣氛好high。經過一輪比賽，陳柏圖成為最後勝利者，將到瑞典代表香港出賽。 輸足兩年 上年大特訓 原來「陳老人」過去兩年都有參加選拔，但都輸咗，上年於決心用一年時間特訓，試盡12個比賽項目，誓要贏比賽。Emily見佢咁有決心終於勝出，感到非常高興，盡顯獅子山精神，至少唔使輸得不明不白先啦！
|
| |
| |
;){kind=small}
;){kind=small}
