【明報專訊】社民連立法會議員長毛梁國雄之前同工業界議員林大輝同場踢波踢到甩骹骨折，瞓咗幾日醫院，噚日終於出院，坐住輪椅返立法會開內會。雖然內會唔夠20分鐘就開完，唔少議員見到「單肢傷殘」嘅長毛都趨前問候，仲話泛民終於有隻「假腳」，可以向工聯會王國興挑機咁話。 話說王國興幾乎每次特首答問大會，都拎隻「假腳」為單肢傷殘人士爭取領傷殘津貼，咁啱下星期五梁振英去立法會同議員午宴，工黨李卓人話，泛民終於有「假腳」可以向王國興挑機。 長毛話，到時可以拋隻假腳送畀CY，但人民力量陳偉業就話，與其等長毛除假腳，不如搵夠4個人，夾手夾腳將成個長毛拋出去仲方便啦﹗
|
| |
| |
