【明報專訊】雖然話男女平等，但有啲行業例如賽馬評述員，仍然係男性天下，100人得5個女性。Emily早幾日同香港最後生嘅女馬評人Kit(李潔瑩)傾過，佢話入行初期飽受阿叔白眼，因為「佢哋賭幾十年馬，點解要聽你一個𡃁妹講嘢」，一度心灰意冷轉行做空姐，最終都放唔低對賽馬嘅熱誠，幾經努力終成為馬評人，仲喺facebook上有過萬追隨者。 30歲嘅Kit自細幫老竇抄賽馬戰果，抄到成為馬迷，但因為深近視同怕辛苦，做唔成騎師同馬伕。到2004年副學士畢業後，佢參加馬壇廣播比賽得季軍，自此投身馬會，負責喺馬場「開壇講馬」，當時受盡白眼，無人聽佢講，佢好灰心，轉行做空姐，但始終賽馬先係佢心目中嘅終身事業，咁啱08年佢工作嘅航空公司執笠，於是佢加入有線講波，為未來講馬做準備。 一度灰心轉職空姐 Kit花咗3年時間雙線發展，睇波又睇馬，經常請教馬圈中人，終於喺2011年獲馬會邀請成為馬評人，負責賽前分析形勢，上年底起仲得到唔少阿伯賞識，肯同佢論馬。佢話其實女性只要肯努力，喺馬圈都可以佔一席位，呼籲大家周日去沙田馬場參加「婦女銀袋日」，證明女性係得嘅！
|
| |
| |
;){kind=small}
