【明報專訊】噚日先慶祝完萬聖夜，轉吓眼聖誕又到，兩大樂園齊齊預告加推港人專用優惠，好似迪士尼樂園，今個月14號至出年1月5號，搞足一個半月「迪士尼雪亮聖誕」主題，推出499蚊港人專用「食買玩」套票，只要喺本月24號之前買套票，就可以喺11月至12月初同埋出年1月，分別入園玩兩次，計番平均每次250蚊，比平時一張成人票450蚊平咗近一半，用呢張套票喺園內餐廳同商店食嘢買嘢，仲有折扣。

迪士尼499蚊玩兩次

另外，今年首次推出「哈囉喂全日祭」、日頭都有得玩鬼屋嘅海洋公園，喺哈囉喂期間共有100萬人次入場，當中超過一半係香港人，為咗答謝本地客支持，公園今日起至下個月20號，會推出小童同全日制學生門票優惠，小童票有五折，即係80蚊一張，全日制學生都有七折，即係224蚊。另外，由𠵱家去到12月31號買「智紛全年入場證」，可以比平時玩多兩個月，有14個月有效期。

海洋公園學生七折

兩樂園嘅優惠票都指定喺網上購買，迪士尼「食買玩」套票仲係先到先得，有興趣嘅市民留意喇。