【明報專訊】公務員事務局長鄧國威(Paul)日前帶11個常任秘書長同部門首長，去北京同江蘇省參加研修課程，佢哋今日會喺北京人民大會堂獲國家領導人接見。不過佢哋會唔會好似保安局長黎棟國早前訪京咁，獲人大委員長張德江咁高級嘅領導接見，公務員事務局到噚日同記者話唔知。 食衛局長高永文今日會到北京訪問兩日，將同國家質檢總局就香港賽馬往返粵港兩地嘅檢疫事宜簽訂合作協議，並同國家質檢總局副局長魏傳忠、農業部副部長于康震會面。政府話，雙方會傾食物安全同H7N9禽流感等問題。 公務員事務局前局長俞宗怡(D姐)2010年帶所有常秘(共15人)到北京研習時，曾獲時任國務委員劉延東接見，當時中聯辦主任彭清華亦有陪同上京。Paul之前就話，如果能獲領導人接見，會反映香港嘅實况。
|
| |
| |
