【Emily】泰國買嘢遇糾紛 可搵消委投訴
[2024.10.25] 發表
【明報專訊】泰國係港人熱門旅遊地，消委會話咩消費都有出現爭議嘅風險，如果遇到糾紛但申索無門，可能會損失慘重。消委會喺2020年至今年首9個月就收到33宗港人喺泰國置業有關嘅投訴，涉及超過600萬元。佢哋噚日就同泰國嘅消委會簽訂協議書，建立信息同投訴個案互通機制。
兩地消委會今次建立嘅互通機制，可以解決因言語不通同司法管轄區不同而未能處理消費糾紛嘅情况。日後不論本港消費者喺泰國、抑或泰國消費者喺香港同當地商戶糾紛，都可以向本身居住地嘅消委會投訴。
喺得到投訴人同意下，居住地消委會會將投訴詳情同文件傳畀當地消委會，由當地消委會協助解決。若商戶提出和解方案或任何回應，當地消委會會透過居住地消委會通知投訴人。前年至今年首9個月期間，消委會接獲6宗泰國旅客投訴，主要涉更改或終止合約同營商手法。
更多港聞
相關新聞
