【Emily】謝偉俊話「製造混亂」 美芬要求收番
[2021.04.23] 發表
【明報專訊】建制派謝偉俊近日言論出位，評論其他議員時，往往引嚟嘩然。立法會噚日召開有關修改選舉制度嘅法案委員會，經民聯梁美芬問到選委可唔可以跨區提名直選候選人嘅問題，點知畀謝偉俊話佢嘅提問「製造混亂」，搞到美芬要求對方「收回言論」。
源於張宇人話畀美芬「混淆咗」
繼政制及內地事務局長曾國衞、建制派「班長」廖長江畀謝偉俊喺會上公開批評後，梁美芬噚日再同謝偉俊「擦出火花」。話說梁美芬喺會上問完問題後，自由黨張宇人追問，提及佢「正話畀梁美芬嘅問題混淆咗」，要求政府澄清。點知謝偉俊發言時，直接話「張宇人議員嘅問題係建基於梁美芬製造嘅混亂，(所以)佢先問嘅」。
梁美芬聞言忍唔住撳掣要求回應，「謝偉俊議員對我啲提問通常情有獨鍾，但係佢咁大頂帽，話呢個混亂係我製造出嚟，我希望佢收番(言論)……因為平時時間有限，我就唔回應佢，但係如果太過分，話呢個混亂係我嘅問題問出嚟，係絕對唔恰當」，強調討論有價值，唔應該貶低其他議員嘅提問。
主持會議嘅委員會副主席張國鈞就打圓場，話謝偉俊應該唔係咁嘅意思，而係話議員理解條文有混亂，叫雙方爭議到此為止。
更多港聞
浮城光影：一個現實的追夢者——與黃修平導演對談
【明報專訊】風度翩翩，笑容可親，往往是黃修平導演給大眾的第一印象。他近年幾部長片作品，都緊貼社會氣氛，道出年輕一代的情緒與處境，《狂舞派》（... 詳情
相關新聞
